Астанада геологтарға құрмет көрсетілді
2018 жылғы 30 наурызда Астанада Қазақстан Республикасы Инвестициялар және даму вице-министрі Қайырбек Өскенбаевтың қатысуымен геология саласы мамандарының кәсіби мерекесі – Геологтар күні құрметіне арналған салтанатты жиналыс болып өтті.
Бұл күні өндіріс озаттары «Қазақстан Республикасының құрметті жер қойнауын барлаушысы», «Қазақстан Республикасы жер қойнауының үздік барлаушысы», «Алғашқы ашылым жасаушы» атақтарына ие болды.
Жиналыста сөз сөйлеген Қ.Өскенбаев ел экономикасының өсуіне зор үлесін қосатын басты салалардың бірі болып табылатын геологиялық барлауды қолдауға ведомство ерекше назара аударатынын баса көрсетті.
Вице-министр «Қазақстан Республикасының кен орнын алғаш ашушы» белгісін Қашаған кен орнын ашқаны үшін KAZENERGY қауымдастығы төрағасының орынбасары Ұзақбай Қарабалин, «Меридиан Петролиум» ЖШС президенті Балтабек Қуандықов, «Батыс Геофиссервис» ЖШС бас директорының орынбасары Ашырали Бижанов, «Норт Каспиан Оперейтинг Компания б.в.» компаниясының 1-ші басқарушы директорының орынбасары Жақып Марабаев, «Қазақстан-Британ техникалық университеті» АҚ президенті Кенжебек Ибрашев, «ENI ISATAY» компаниясының менеджері Клара Раева, «Смартинжиниринг» ЖШС бас геофизигі Олег Турков, «Меридиан Петролиум» ЖШС бас геофизигі Марис Назаров марапаттады.
Сондай-ақ «Жер қойнауының құрметті барлаушысы» төсбелгісіне «Центргеосъемка» ЖШС вице-президенті В.Тапаев және «Қазгеология» АҚ Кешендік геология партиясының бас геофизигі С.Беляков ие болды. Жер қойнауын барлаудың үздігі атағын «Қазгеология» АҚ Геология департаментінің 1-ші санаттағы геологы Әсет Бекетов иеленді.
«Еңбек ардагері» медалімен «Қазгеология» АҚ геофизикалық зерттеу департаментінің 1-ші санаттағы геофизигі Барлыбай Смагұлов және «Қазгеоақпарат» орталығының жоғарғы санаттағы инженері Бибисара Бегленова марапатталды.
Сонымен бірге геология саласына қосқан үлесі үшін КР Инвестициялар және даму министрі атынан Құрмет грамоталары мен Алғыс хаттарымен марапатталғандардың қатарында ҚР Ғылым академиясының академигі Серікбек Дәукеев, «Жас геолог» қорының директоры Жанат Исмаилова, Геология және жер қойнауын пайдалану комитетінің бас сарапшысы Шолпан Ағыбаева және басқа да азаматтар.
Мемлекет басшысы геологиялық барлау саласын дамытып, әлемдік деңгейге шығу жөнінде міндет қойды. Қойылған міндетті орындау мақсатында озық әлемдік тәжірибеге негізделген «Жер қойнауы және жер қойнауын пайдалану туралы» ҚР кодексі әзірленіп, қабылданды.
Жаңа кодексті енгізу инвестициялық тартымдылықты арттырып, отандық юниорлық компаниялардың дамуына серпін береді.
Кодекстегі озық әлемдік тәжірибеге негізделген жаңалықтар Қазақстан Республикасындағы жер қойнауын пайдалану саласында бәсекелестікті қамтамасыз ете отырып, жаңа кен орындарын ашуға, озық технологиялар трансфертін тартуға, сала инфрақұрылымын дамытуға әрі жаңа жұмыс орындарын ашуға негіз қалайды.
ҚР Президенті Н.Назарбаевтың 2016 жылғы жарлығымен Қазақстанның геологтарының кәсіби мерекесі тағайындалған еді. Қазір бұл салада 180 мыңға жуық адам еңбек етеді.
Чествование геологов 2018
